2024 yilning 27 dekabr kuni poytaxtdagi “Impulse event zone” tadbirlar zalida “BRB do`stlari” muloqot klubining “Biznesni rivojlantirish banki” ATBning joriy yildagi faoliyati yakunlariga bag`ishlangan navbatdagi tadbiri tashkil etildi.
Unda bank rahbariyati, jurnalistlar, blogerlar va jamoatchilik faollari ishtirok etdi.
Bank tomonidan nihoyasiga etayotgan yilda ham barcha yo`nalishlarda mijozlar uchun qulaylik yaratish, faoliyatga ilg`or, zamonaviy yondashuvlarni joriy etish ustida muntazam izlanishlar olib borildi. “Data Warehouse” (DWH) mazkur yo`nalishdagi faoliyatning navbatdagi natijasidir. Bu katta hajmdagi ma`lumotlarni integrasiya va tahlil qilish uchun mo`ljallangan tizimdir.
Bu tizim orqali ichki va tashqi manbalardagi ma`lumotlarni integrasiya qilish, tendensiyalarini tahlil qilish va prognozlash, katta hajmdagi ma`lumotlarni qisqa fursatda analiz qilish va qayta ishlash, istiqboldagi vazifalarni aniq rejalashtirish kabi muhim funksiyalarni amalga oshirish mumkin bo`ladi.
Shu bilan birga, mijozlarni segmentlash, tadbirkorlarga yanada qulaylik yaratish, iqtisodiyoti va g`aznasini, pul oqimi, buxgalteriya va soliq hisobotlarini boshqarish jarayonlarini soddalashtiradi. Bankda yaratiladigan ma`lumotlar bazasi esa sotuvlarni oshirish imkoniyatini yaxshilaydi.
Tezlik, hisobot, sifat tushunchalari mazkur tizim faoliyatining asosini tashkil etadi. Tadbir ishtirokchilariga ushbu tizim haqidagi batafsil taqdimot o`tkazildi.
Eslatib o`tamiz, “BRB do`stlari” loyihasi bankning jamoatchilik bilan doimiy muloqot platformasi bo`lib, unda jamoatchilikka “Biznesni rivojlantirish banki” ATB faoliyatiga doir axborotlar beriladi, bank faoliyatini takomillashtirishga doir taklif-tavsiyalar ilgari suriladi va turli muhokamalar tashkil etiladi.
Tadbir samimiy muloqot ruhida o`tdi. Jurnalistlar, blogerlar va jamoatchilik vakillari o`zlarini qiziqtirgan masalalar va taqdimotlar yuzasidan o`z taklif va fikrlarini bildirishdi.
“BRB do`stlari” klubi doirasidagi bunday noan`anaviy muloqotlar muntazam o`tkazib boriladi.
УЗ
