Тошкентда юристконсульт ҳамда Иқтисодиёт ва молия бошқармаси бош мутахассиси пора билан қўлга олинди

ДХХ ва ИЖҚКД ходимлари томонидан ҳудудларда коррупцион ҳолатлар аниқланди.

Жумладан, Тошкент шаҳар ҳокимлиги
Юридик бошқарма юристконсульти чет эллик фуқарога тегишли кўчмас мулк учун ажратилган 8,8 млрд сўм компенсацияни тезлаштириб бериш эвазига 70 минг АҚШ доллари олган пайтида ушланди.

Кейинчалик, юристконсульт компенсация жараёнини тезлаштириш учун Тошкент шаҳар Иқтисодиёт ва молия бошқармаси бош мутахассисига 10 минг АҚШ доллари бергани маълум бўлиб, бош мутахассис ҳам ушланган.

Шунингдек, Сурхондарё вилоятида "Ҳудудгаз Сурхондарё" филиали ходими фуқарони йўл-транспорт ҳодисаси ортидан 11 млн сўмлик жаримага тортмаслик эвазига 400 АҚШ доллари ва 500 минг сўм талаб қилиб, 3,9 млн сўм ва 100 АҚШ доллари олган вақтда ушланган.

Жиззах вилоятида эса Кадастр инспектори ўзбошимчалик билан қурилган уй ҳужжатларини расмийлаштириш ва жаримани камайтириш учун 400 АҚШ доллари олган вақтида қўлга тушган.

Бундан ташқари, Қашқадарё вилояти Кадастр муҳандиси 2 гектар сувли ва 35 сотих ноқонуний ерни расмийлаштириш эвазига 585 млн сўм талаб қилиб, 17 минг АҚШ доллари олган пайтида ҳибсга олинган. Шунингдек Қарши шаҳри
Мажбурий ижро бюроси ижрочиси жабрланувчига 554 млн сўм зарарни қайтариш эвазига 4 млн сўм ва 100 АҚШ доллари олган вақтда ушланган.

Шунингдек, Сирдарё вилояти Энергосавдо инспектори фермер хўжалигини электр тармоққа қайта улаш учун 7 млн сўм пора олганида қўлга олинган.

Барча ҳолатлар бўйича жиноят ишлари қўзғатилиб, тергов давом этмоқда.