Бош вазир ахборот хизмати ходими маълумот беришда адашмадими?
Ўзбекистон Республикаси Бош вазири Абдулла Арипов ZF-UZ-VAC-2001 ўзбек-хитой вакцинаси билан жорий йилнинг бошида биринчилардан бўлиб эмлангани ҳақида Бош вазир матбуот хизмати ходими daryo.uz ва kun.uz га тасдиқлаб маълумот берган эди.
Rost24.uz ахборот сайти мухбири Бош вазир А.Ариповнинг йил бошида вакцина билан тўлиқ эмлангани борасидаги ушбу маълумотларни ўрганди.
Маълумки, жорий йилнинг бошида ZF-UZ-VAC-2001 ўзбек-хитой вакцинаси расман тасдиқланмаган ва фақат кўнгиллиларга қилинаётган эди. Ушбу вакцина расман 2021 йил 1 март санасида Ўзбекистонда рўйхатга олинди. 1 апрелдан бошлаб аҳолини оммавий эмлаш жараёни бошланди.
Хўш, март ойида рухсат берилган, апрелда оммавий эмлаш бошланган бўлса, йил бошидан бу вакцина билан тўлиқ қандай эмаланиб улгуриш мумкин, деган ҳақли савол туғилади.
Вакцина тасдиқланган санадан ҳисобланган тақдирда ҳам бош вазир йил бошидаёқ тўлиқ уч босқичдан иборат эмлаш жараёнидан ўтиб улгирмаган бўлар эди. Ҳар бир вакцина оралиғи тахминан 20 кун бўлиши керак. Демак, Бош вазир Абдулла Арипов кўнгиллилар сафида коронавирусга қарши эмланганмиди?
rost24.uz сайти мухбири Бош вазирнинг 2021 йил бошида тўлиқ ўзбек-хитой вакцинаси билан эмланиб бўлгани ҳақидаги хабарга шубҳа билан қараб Ариповнинг матбуот хизмати ходими Бекзод Ҳидоятовга мурожаат қилди. Б.Ҳидоятовнинг rost24.uz мухбирига маълум қилишича, Бош вазир Абдулла Арипов ZF-UZ-VAC-2001 ўзбек-хитой вакцинасини кўнгиллилар сафида олмаган. У вакцина расман тасдиқдан ўтгачгина биринчилардан бўлиб эмланган. Яна Ҳидоятовнинг айтишича, у йилнинг бошида деганда, йилнинг биринчи 3 ойини назарда тутганини билдирди.
Демак берилаётган маълумотлар занжирига эътибор қаратсак, Абдулла Арипов 1 март санасидан сўнг ZF-UZ-VAC-2001 ўзбек-хитой вакцинаси билан эмланган. Шунда уч босқичли эмлаш жараёнларининг тугаши жорий йилнинг май ойларига тўғри келмоқда. Бекзод Ҳидоятовнинг айтишича, эмланувчи вакцинани яхши кўтарса эмлаш оралиғи 20 кундан ҳам қисқартирилиши мумкин экан. Бироқ, эмлаш оралиғи 20 кундан қисқартирилса-да, Ариповнинг тўлиқ коронавирусга қарши эмланиб бўлиш санаси йилнинг бошига тўғри келмаяпти.
Масъул идораларимизнинг масъул вакиллари маълумотларни жамоатчиликка етказаётганда масъулиятни ҳис қилган ҳолда тарқатсалар, турли савол ва англашилмовчиликларга эҳтиёж қолмас эди.
УЗ
