Mahalla guzariga ajratilgan erga tadbirkor o`z-o`zidan ko`p qavatli uy qurishi mumkinmi? Nima uchun Toshkent shahrida qurilish va buzilishlar bo`yicha ana shunday muammolar ko`p? Go`yo shahar bedarvozayu, hokimlar nayrangbozdek...
Rost24.uzga murojaat kelib tushdi, unga ko`ra noqonuniy qurilmoqchi bo`lgan bino qurilishi to`xtatilgan, lekin hali hanuz chala binoning taqdiri uchun bir echimga kelinmagan. Sabab nima? Muxbirimiz bu masalani atroflicha o`rgandi. Kalavani uchi yana hokimiyatga borib taqalmoqda.
Toshkent shahar Olmazor tumani Qora-qamish 2/1 dahasi “Istiqbol” mahallasida istiqomat qiluvchi fuqarolar ko`p qavatli uylari yonidagi chala qolgan qurilish joyidan xavotirda.
2017 yilda “Istiqbol” mahallasi Qora-qamish 2/1 mavzesi 1A, 6 va 9-uylar oralig`ida bino qurish ishlari boshlangan.
Hujjatlarni tekshirish natijasida bu qurilayotgan ko`p qavatli bino noqonuniy ekanligi, aslida bu erga mahalla guzari qurish rejaga kiritilganligi aniqlangan
2018 yilga kelib esa aholining ko`p joylarga qilgan murojaati tufayli qurilish to`xtatilgan, lekin, aholi uchun mahalla guzari qilib berilmagan. Aholi tomonidan Prezident qabulxonasidan tortib, mahalliy hokimiyatlargacha murojaat qilingan, ammo hech qanday natija yo`q.
“Tashlandiq bo`lib qolgan bu qurilish atrofi juda abgor holatda, qurilish ichiga esa yosh bolalar kirib o`ynamoqda. Biz esa nimadir bo`lishidan qo`rqamiz. Bino qurilmasdan turib ikki marta yonib ham ketdi” deydi mahalla fuqarolaridan biri.
Rost24.uz muxbiri bu borada Toshkent shahar Olmazor tuman hokimiyati, Arxitektura bo`limidan munosabat so`radi. Mas`ul tashkilotning hujjatlariga ko`ra mazkur joyda mahalla guzari qad rostlashi nazarda tutilgan. Erni hokimiyat tadbirkorga mahalla guzari qurish uchun ajratib bergan, ammo tadbirkor ko`p qavatli uy qurishni boshlagan. Alaloqibat aholi noroziligi tufayli qurilish to`xtab qolgan.
Qiziq, mahalla guzari uchun ajratilgan erga tadbirkor nega o`z-o`zidan ko`p qavatli uy qura boshlagan? Bunda hokimlikning norasmiy aloqasi bormi?
Bunday holatlar nafaqat Toshkentda balki, boshqa hududlarda ham tez-tez kuzatilmoqda. Javobgar taraflar ya`ni hokimliklar esa jim. Go`yoki yana shunday nayranglar tuzish bilan banddek.
УЗ
