Aybi yo`q odamlarni aybdor qilish, qotilliklarni bo`yniga ilish bilan qo`rqitish, kaltaklash va zug`um o`tkazish...
Ma`lumki, ichki ishlar organlari fuqarolarning tinchlik-osoyishtaligini saqlovchi, huquq va erkinliklarini himoya qiluvchi idora sanaladi.
Ammo kundalik hayotimizda tizimning ayrim xodimlari tomonidan sodir etilgan jinoyatlar yoki qaysidir shaxsning huquqini poymol qiluvchi xatti-harakatlarga ham duch kelib qolyapmizki, bu aksariyat qonun himoyachilarining yuqorida tilga olingan sharafli va mas`uliyatli ishlariga soya tashlamoqda.
Namangan viloyat ichki ishlar boshqarmasining Jinoyat qidiruv boshqarmasi katta tezkor vakillari Jamoliddin To`raev va Xolmurod Egamberdievlar ana shunday o`zini xon, ko`lankasini maydon sanagan xodimlardan bo`lib chiqishdi.
Gap shundaki, boshqarma topshirig`i bilan Pop tumaniga kelgan ikkala tezkor vakil tumanning A.Navoiy mahallasi hududidagi «Lazzat» kafesidan “Fast-food" eguligini sotib olishadi. Biroq kafeda bo`sh o`rindiqlar bo`lmagani uchun qo`shni “Ifora” nomli muzqaymoq shoxobchasiga kirib tamaddi qilishadi. So`ngra “Fast-food«ning chiqindisini shoxobcha hududiga tashlashadi. Bu mahal esa “Ifora” sotuvchisi Doniyor G`oipov tozalov ishlarini amalga oshirayotgan edi.
Sotuvchi yigit ham iltimos, ham tanbeh ma`nosida ularga «Akalar, chiqindisini bu erga tashlamang. Ko`ryapsizlar, hamma yoqni tozalayapman», deydi. Ammo D.G`oipov niqobini echib qo`ygan holda ishlayotgandi. Mazkur holat esa IIB xodimlariga juda qo`l keladi.
X.Egamberdiev uyali telefonida Doniyorni suratga oladi. O`z navbatida xodimlar ham niqobsiz holatda bo`lib, karantin qoidalariga amal qilishmagandi.
Shu bois mezbon yigit ham ularni mobil telefoni orqali suratga tushiradi. Pirovardida D.G`oipov hamda xodimlar o`rtasida og`zaki tortishuv yuz beradi. Qolaversa, Xolmurod Doniyorning uyali telefonini olib qo`yadi.
So`ng Jamoliddin ikkalasi uning qo`llarni qayirib, tuman ichki ishlar bo`limiga olib ketishadi.
IIB binosiga olib kirgach esa D.G`oipovning qorin va yuz qismiga urishadi. Keyin boyaqish yigitni 3-qavatga olib chiqishadi. Natijada yuqori qavatdagi xonada X.Egamberdiev qo`llari bilan uning qorin, bosh va peshona sohalariga zarba beradi. J.To`raev esa ikki-uchta ish jurnallarini birlashtirib, “Ifora” xizmatchisining peshonasiga ura boshlaydi. Bu ham etmagandek, erga o`tirgan holda oyoqlarini cho`zib, qo`llarini boshining orqasiga qo`yishni buyuradi. Binobarin, Doniyor ketma-ket berilgan kaltak va zarbalar og`rig`iga chidolmay qoladi. Iltimos, kechirim so`rashga tushadi.
Lekin oddiy fuqaroning e`tirozini qabul qilishni o`rganmagan xodimlarga iltimosu yalinishlar kor qilmasdi o`sha damda. Aksincha, shundan keyin Jamoliddin va Xolmurod Doniyorni kurakda turmaydigan so`zlar bilan haqorat qilishadi. Eng achinarlisi, to`g`ri gapni gapirib baloga qolgan yigitni «Hali sen shoshmay tur, «G`urumsaroy»da yuz bergan qotillikni bo`yningga ilib qo`yamiz», deb qo`rqitishadi.
So`ng katta tezkor vakillar hudud profilaktika inspektori Nazirjon Halimjonovni bo`limga chaqirtirib, niqobsiz yurgani uchun D.G`oipovga nisbatan ma`muriy bayonnoma rasmiylashtirishni buyurishadi. Natijada N.Halimjonov Doniyorni IIBdan olib chiqib, vaqtincha muzqaymoq shoxobchasiga tashlab ketadi.
Albatta, inson boshiga biror-bir tashvish tushsa, birinchi galda yaqinlari, jigarlariga suyanadi. Shu ma`noda aytganda, Doniyor ham darhol akasi Dilmurod G`oipovga qo`ng`iroq qilib, bo`lgan voqeani ipidan-ignasiga so`zlab beradi. Bunday nohaqlikka toqat qilolmagan Dilmurod esa o`sha zahotiyoq Pop tuman prokuraturasiga ariza bilan murojaat qiladi. Doniyor tuman prokuraturasi tashqarisida turgan vaqtida bo`lsa, profilaktika inspektori kelib, unga nisbatan O`zbekiston Respublikasi Ma`muriy javobgarlik to`g`risidagi kodeksining 54-moddasi 2-qismi bilan ma`muriy bayonnoma rasmiylashtiradi. Ammo Doniyorning ahvoli yomonlashib, tuman markaziy shifoxonasiga tushib qoladi.
Shundan so`ng mazkur holat yuzasida surishtiruv ishlari olib borilib, «qonun himoyachilari»ga nisbatan jinoyat ishlari qo`zg`atiladi. Uddaburonlikni qarangki, o`z qilmishining oqibatini yaxshi bilgan aybdorlar surishtiruv-tergov jarayonlarida jabrlanuvchiga moddiy va ma`naviy zarar hisobida 10.000.000 so`m naqd pul berishadi.
Kezi kelganda shuni alohida ta`kidlash lozimki, o`z jinoyati tufayli o`zgalarga zarar etkazgan har qanday shaxs keltirgan zararining o`rnini qoplashi shart. Biroq bu aybdorning jazodan ozod qilmaydi.
Binobarin, ayni ish ham jinoyat ishlari bo`yicha Pop tuman sudida ko`rib chiqildi. Namangan viloyati Pop tumani prokurori Husniddin HAKIMOVning rost24.uz ga ma`lum qilishicha, sud ikkala tezkor vakilni ham Jinoyat kodeksi 206-moddasining 1-qismi, 234-moddasining 1-qismi bilan aybdor deb topdi. Natijada ularni 3 (uch) yil muddatga ichki ishlar organlari tizimida ishlash huquqidan mahrum qilib, bazaviy hisoblash miqdorining yigirma baravari miqdorida jarima jazosi tayinladi.
УЗ
